رمزِ زندگی
Ramz E Zindagi
Shayar
Mauzu
Roz ka sher
Ramz
Meri pasand
Search
Home
›
Shayar
›
Mirza Ghalib
›
Ghazal
جب تک دہان زخم نہ پیدا کرے کوئی
Ghazal ·
Mirza Ghalib ·
مرزا غالب
· 13 sher
غم
Gham
حسن
Husn
انتظار
Intezar
جب تک دہان زخم نہ پیدا کرے کوئی
مشکل، کہ تجھ سے راہ سخن وا کرے کوئی
عالم غبار وحشت مجنوں ہے سر بہ سر
کب تک خیال طرۂ لیلی کرے کوئی
افسردگی نہیں طرب انشائے التفات
ہاں درد بن کے دل میں مگر جا کرے کوئی
رونے سے اے ندیم ملامت نہ کر مجھے
آخر کبھی تو عقدۂ دل وا کرے کوئی
شعر تمثال جلوہ عرض کر، اے حسن، کب تلک
آئینۂ خیال کو دیکھا کرے کوئی
چاک جگر سے جب رہ پرسش نہ وا ہوئی
کیا فائدہ کہ جیب کو رسوا کرے کوئی
لخت جگر سے ہے رگ ہر خار شاخ گل
تا چند باغبانیٔ صحرا کرے کوئی
ناکامیٔ نگاہ ہے برق نظارہ سوز
تو وہ نہیں کہ تجھ کو تماشا کرے کوئی
ہر سنگ و خشت ہے صدف گوہر شکست
نقصاں نہیں جنوں سے جو سودا کرے کوئی
سر بر ہوئی نہ وعدۂ صبر آزما سے عمر
فرصت کہاں کہ تیری تمنا کرے کوئی
ہے وحشت طبیعت ایجاد یاس خیز
یہ درد وہ نہیں کہ نہ پیدا کرے کوئی مصرع
بے کاریٔ جنوں کو ہے سر پیٹنے کا شغل
جب ہاتھ ٹوٹ جائیں تو پھر کیا کرے کوئی
حسن فروغ شمع سخن دور ہے اسد
پہلے دل گداختہ پیدا کرے کوئی
Mirza Ghalib ka aur kalaam
Koi aur sher